“Lans” Liqa 1-in “zirzəmi“sinə dəmi

“Lans” Liqa 1-in “zirzəmi“sinə dəmir atmaqdadı. Ardıcıl xal itkiləri debütantı yenidən aşağı liqaya yaxınlaşdırıb. Son turda “Lion”a evdə 0:2 hesabıyla uduzan şimallıları Qbamin (22-avtoqol) və Lakazettenin (26) qolları üzdü. 21 tura 19 xal toplayan və turnir cədvəlinin 19-cu pilləsinə enən “Lans”a dalbadal 2 qələbə gərəkdi ki, vəziyyətini nisbətən düzəltsin.


Artıq aydın olub ki, Hafiz Məmmədov yayadək klubun səhmdarıdı. Azərbaycanlı iş adamı mojaritar qaydada sahibi olduğu “qırmızı-sarılar”ın mövcud borclarını ödəyəcəyini bildirib. Bakıda Jerve Marteli qəbul edən maqnat 14 milyon avronu 3 hissədə hesaba yatırdacaq. Yanvarın sonunadək 4, fevral və mart aylarının hərəsində isə 5 milyon avro verəcək. “Lans” fevralın 2-də Peşəkar Klublara Nəzarət Komissiyasına (DNCG) zəmanət məktubu təqdim etməlidi ki, apardığı transfer əməliyyailarına rəsmiyyət hüququ qazandırsın.


Hərçənd Fransanın özündə hələ də inanmırlar ki, H.Məmmədov ümumi mənzərəni öz xeyrinə dəyişdirsin. Gündəlik 'Aujourd' nəşri iddia edir ki, onun rəhbəri olduğu 'BAGHLAN GROUP' iqtisadi durumunu düzəltməyib və yaxın gələcəkdə əvvəlki imkanlarını bərpa etməsi real deyil. Şirkətin defolt olmasına diqqət çəkən həmkarlarımızın fikrincə, Məmmədovun 14 milyonu ödəməsi qeyri-realdı. Düzdü, tanınmış biznesmenin kapitalını 900 milyon avro dəyərləndirən başqa fransız jurnalistlər də var və onlar hesab edir ki, qaranlıq məqamlar ortalığı qarışdırıb. Ona görə ki, DNCG-nin 'Lans'ın sahibi ilə bağlı şübhələri hələ aradan qalxmayıb.


Bu arada baş məşqçi Antuan Kombuare klubu qeyri-müəyyənlik içində atıb getməmək qərarı alıb. Rəhbərliklə görüşən baş məşqçi mövsümün axırınadək işini davam etdirəcək: “Biz Martelə inanırıq. Heç nəyə baxmayraq, prezidentə etibarımız qalmaqdadı. Hafiz Məmmədov “Lans”la əmkdaşlığını dayandırmamaq fikrindədi, mənim isə onunla heç bir əlaqəm yoxdu. Martellə münasibəti qaydasındadı. İndiki vaxtda “Lans”ı atıb getməyim düzgün olmaz. Liqa 1-də mövsüm başa çatanadək işimin başındayam.


Ancaq onu da başa düşürəm ki, ikinci dövrənin qalan oyunları bizim üçün çox ağır keçəcək. Güclü heyət yığa bilməmişik. Gedənlər var və daha bir neçə nəfər gedə bilər. Futbolçularımızı istəyirlər. Mən isə onları aldatmaq istəmirəm. Klubumuzun vəziyyətinin doğrudan da düzəlmək üzrə olmasını mən də bilmirəm. Komandamla hər gün bu barədə danışıram və deyirəm ki, “Lans”ın keçmişi var, hamımız gücü bir yerə qoymalı, sonadək mübarizə aparmalıyıq”.


Sportinfo.az-ın bu konteksdə əldə etdiyi məlumata görə, 'Lans'ın ağır periodu aşmasında 'Atletiko' da kömək göstərə bilər. Madrid təmsilçisi həm pulsuz futbolçu vermək, həm də maddi yardımla 'Land of fire Azerbaijan' forması geyinən 'kiçik qardaş'ına kömək etməyə hazırdı. Məmmədovun son İspaniya səfərində bu məsələnin müzakirə olunduğu bildirilir. Niyə də yox? Axı “Atletiko” artıq “'Bakı“ya ilk dəstəyini verib.


Martelin səhmdarla Bakıdakı görüşü və bundan sonra Fransaya qayıdaraq verdiyi açıqlama “Lans“ prizmasından birmənalıdı. Klub prezidenti Anar Məmmədovun səhmlər paketini almayacağını və Hafiz Məmmədovun qərarını dəyişdirmədiyini bildirməklə, Sportinfo.az-ın yaxın keçmişdə tirajladığı xəbərləri təsdiqləmiş oldu. Fransa KİV-i tez-tez saytımıza istinad edir və yaydığımız informasiyaları oxucuları ilə bölüşür.


Bununla belə, nədənsə proseslərin növbəti mərhəlsi barədə öncədən yazdığımız məlumatları şübhə altına alanlar hələ də çoxluq təşkil edir. Sportinfo.az-ın son bilgisini isə tərəddüd etmədən versinlər: Hafiz Məmmədov fəaliyyətini doundurmuş əsas gəlir gətirən müəssisələrinin fevralda açılacağına ümidlidi və buna görə “Lans“la vidalaşmır.

- See more at: http://sportinfo.az/news-33922#sthash.q1HFybHa.dpuf