Səhmlərinin üçdə ikisi “Baghlan Gro

Səhmlərinin üçdə ikisi “Baghlan Group” şirkətinin prezidenti Hafiz Məmmədova məxsus olan “Lans” ətrafındakı qalmaqal yeni mərhələyə daxil olub. Fransa KİV-ləri klubun nəzarət səhm paketinin hazırkı sahibinin kim olduğunun açıq qaldığını yazır. “Lans”prezidenti Jerve Martel isə jurnalistlərə bildirib ki, məsələni aydınlaşdırmaq üçün yanvarın 12-də Bakıya Ötən ay “Qarant Holdinq“in sahibi, Qolf Federasiyasının prezidenti Anar Məmmədov “Lans”ın futbolçu transferi hüququ əldə etməsi üçün lazım olan məbləği - 2,5 milyon avronu Hafiz Məmmədovun əvəzindən “Point to Point” offşor şirkəti üzərindən klubun bank hesabına köçürüb.


İstər yerli, istərsə də fransız mediası həmin vaxt bəyan etmişdi ki, bağlanmış müqavilənin şərtinə əsasən əgər Hafiz Məmmədov borc kimi verilən həmin məbləği dekabrın 31-nə qədər qaytarmasa, “Lans”ın səhmlərinin üçdə ikisi Anar Məmmədovun mülkiyyətinə keçəcək. Başqa sözlə desək, Hafiz Məmmədovun 20 milyon avroya aldığı səhm paketini nəqliyyat nazirinin oğlu cəmi 2,5 milyon avroya sahiblənmiş olacaqdı.


Əsl qalmaqal bu xəbərlərin yayılmasından sonra başladı. H.Məmmədov bəyanatla çıxış edərək bildirdi ki, o, sözügedən müqaviləyə imza atmayıb və “Lans”ıq səhmlərinin başqa investora keçməsinə dair heç bir hüquqi razılaşma yoxdu. Fransa KİV-ləri isə xəbər verdi ki, 2,5 milyon avronun ödənilməsinə dair müqavilədə H.Məmmədovun imzası saxtadır və Fransanın Peşəkar Klublara Nəzarət Komissiyası (DSNJ) bu məsələni araşdırır.


Beləliklə, əgər müqavilə həmin şərtlə imzalanmışdısa və orada H.Məmmədovun imzası yer alırdısa, o zaman yanvarın 1-dən etibarən “Lans”ın nəzarət səhm paketinin hüquqi sahibi Anar Məmmədov olmalı idi. Bu baxımdan Fransa mediası yanvarın 1-i olan kimi aşağıdakı suala cavab axtarmağa çalışdılar: “Lans”ın sahibi kimdi: Anar, yoxsa Hafiz Məmmədov?


Həmin suala hələlik Sportinfo.az cavab verib. Saytımızda olan olan məlumata görə, H.Məmmədov kluba nəzarəti özündə saxlayıb və geri çəkilmək fikrindən uzaqdı. Tanınmış iş adamı mülkiyyətindəki obyektləri banka girov qoyub kredit götürmək hesabına da olsa, bu işdən qopmamağa çalışır. Və yəqin ki, proseslərin indiki mərhələsində geri çəkilməmək üçün bütün imkanlarını və əlaqələrini sonadək işə salacaq.


“La Voix du Nord” qəzetinin yazdığına görə, heç Jerve Martel özü də bu sualın cavabını bilmir. Yanvarın 8-də jurnalistlərə bildirib ki, məsələni aydınlaşdırmaq üçün bu həftənin sonunda Bakıya yollanacaq. Səfərin məqsədi “Lans”ın səhmdarının Anar, yoxsa Hafiz Məmmədov olduğunu aydınlaşdırmaqdı. Onun sözlərinə görə, iki Məmmədovdan biri klubun maliyyə gələcəyini həll edəcək.


Qəzet xatırladır ki, dekabrda Azərbaycan tərəfinin “Lans”ın problemini nəqliyyat nazirinin oğlunun vasitəsilə həll etdiyi haqda xəbərlər yayılmışdı. Lakin H.Məmmədov qəzəbli bəyanat yayaraq “mən belə müqavilə imzalamamışam” dedi. “Lans” isə bu gözlənilməz dönüşlə bağlı susmağa üstünlük verdi. “Lans”ın büdcəsinə Anar Məmmədov tərəfindən 2,5 milyon avronun ödənilməsinə dair bağlanmış müqavilədə imza atan tərəflərdən biri olan Jerve Martel bu vaxta qədər nə H.Məmmədovun imzasının saxta olduğu haqda iddialara, nə də klubun sahibinin Hafiz, yoxsa Anar Məmmədov olduğuna aydınlıq gətirib.


“Mən hər şeyi aydınlaşdırmaq ümidi ilə Bakıya gedirəm. Bu, klubun gələcəyi üçün çox mühümdü. Bizim sahibimiz kimdi? Bu, Hafiz də ola bilər, Anar da, bir başqası da. Mən hələ heç nə bilmirəm, heç nə bitmiş hesab edilmir... Mənim əlimdə bütün məlumatlar var, ancaq sizə heç nə deyə bilmərəm. Xahiş edirəm, indi məndən başqa heç nə soruşmayın. Əminəm ki, sonda istəyimizə çatacağıq“.


Martel deyib ki, Peşəkar Klublara Nəzarət Komisiyyası (DNCG) iki məsələyə cavab verilməsini gözləyir: klubun mülkiyyətçisinin kim olduğuna real olaraq aydınlıq gətirilsin, həmçinin kluba mövsümü başa çatdırmaq üçün lazım olan 10, yaxud 14 milyon avro ödənilsin: “Mən “Genqam“la oyundan sonra Bakıdan DNCG-nin bu suallarına dəqiq cavab gətirmək üçün səy göstərəcəyik. İşin bundan ağır tərəfi yoxdu. Aylardı gözləmə mövqeyindəyik. Hafiz Məmmədovun bizimlə qalacağını istisna etmirəm. Hər halda hər şey danışıqlarımızdan asılıdı”.

“L'Equipe” yazıb ki, DNCG “Lans”a 14 milyon avronun ödənilməsi üçün son müddət kimi yanvarın 31-dək vaxt verib. Əgər bu vəsait həmin vaxta qədər ödənilməsə, “Lans” çıxılmaz vəziyyətdə qalacaq və Liqa 1-in ikinci dövrəsindən uzaqlaşdırılacaq. Yüksək liqadan çıxarılacaq komandanın nəticələri ləğv olunacaq və onlarla oyunlarda xal itirmiş rəqiblərə 3:0 hesablı texniki qələb veriləcək. Liqa 2-ə düşürülərsə, klubun yaxalandığı mürəkkəb vəziyyətdən çıxmaq üçün məhkəməyə müraciət hüququnu özündə saxlayır. Çünki ortada rəsmi zəmanət məktubu var və bu, “Lans”ın son çıxış vasitəsidi.


Sportinfo.az-ın bu gün əldə etdiyi məlumata görə, H.Məmmədov hələ İspaniyadan vətən qayıtmayıb. Həftəiçi Madriddə “Atletiko” - Real” matçını izləyən iş adamının sabah günortadan sonra Bakıya dönəcəyi gözlənilir. Odu ki, Martelin onunla görüşünün 1 gün ertələnməsi mümkündü. Son bəyanatında ortaya qoyduğu iddia və bu iddianın elə-belə olmadığını göstərən əminlik Məmmədovun əlinin hələ də boşalmamasına faktdı. Uduzacağını bilən və bununla da məğlubiyyətin qaçılmazlığını düşünən şəxs o cür bəyanatla gündəm yaratmazdı. Deməli, ünlü iş adamı nələrəsə görə arxayındı və hadisələrin inkitşafının dəyişmək, yaxud yekunlaşmaq mərhələsinə çatmasından xəbərdardı.

- See more at: http://sportinfo.az/news-33136/?n=l#sthash.PB8WlQTc.dpuf